靚靚山海戀

☆擁有此書購買方式：

一.五南文化廣場

     電話 04-22260330

     郵政劃撥 22255688

     戶名:五楠圖書用品股份有限公司

二.國家書店松江門市

     電話 02-25180207

     國家網路書店https://www.govbooks.com.tw

☆☆本書的創作來由及內容簡介：              

有魔法个繪本(客語)     彭歲玲/澎澎先生

南投在台灣个中央，像台灣个心臟共樣。有機緣來到這位同一群先生共下創作，感覺當難得，淑后科長毋係客家人，做得恁會講客家話，又恁用心推廣，𠊎係分佢个熱情感動著，正會來到這位。從台東來到南投，路頭正經當遠，毋過，看著大家共下創作出來个作品，恁靚又有意義，正式當感動，當有價值!

𠊎兜十六儕人分工合作編寫摎畫圖，虎山藝術館个日頭見證大家个煞猛，八日个時間就完成四隻故事。疫情个關係，一開始係上網在線項討論故事，經過兩日大家在網路譫哆，從分享个生活經驗肚尋著故事个主題，分做四組，發展出當有在地特色个故事。

第一組

魔法阿婆：這隻故事係根據金燕先生佢在矯正署教受刑人煮客家菜發生个正式(真實)案例，加入想像來編寫，客家阿婆有魔法，魔法籠床肚个魔法菜分後生人體會著愛做有用个人，愛曉得感恩，用幾下位後生人个改變，呈現客家阿婆个愛心摎客家菜个厲害。

.....................................................................................................................................

第二組

綻筍个大地：戴在南投个人無辦法添放忒921大地動，這組就選用鳥仔做主角，用八色鳥兩子阿公个對話來呈現地動前後大地个變化，該載這下既經就像綻筍樣仔復興了，故事肚有南投个地景摎文化，連咖啡都當有故事。

................................................................

第三組

BUBU摎 HAHA：南投這位有當多原住民，這組就選用布農族細阿妹摎客家細阿哥做主角，生趣个對話呈現原客之間生活肚有當多無共樣个所在，毋過，大家互相尊重互相欣賞，呈現原客一家親个和挼。

................................................................

第四組

尋火雞卵：大家在構想故事个時節，勇仁校長分享佢細个時節識分火雞逐，原來當多人乜有共同个回憶，這組就用搞頭王阿仁牯做主角，描寫好搞个生趣情景，後來佢兜去尋火雞卵，尋著後个結局，呈現對新生命个期待。

這本書有奇術(魔法)，金燕先生請𠊎兜食佢自家做个酸柑茶，食了過後，喉嗹頭甘甘，回甘个滋味就像有法術分人聯想著，酸柑茶經過九蒸九晒，就像人生經歷過个苦難，擔硬認真行過都會轉甘；就像故事裡肚受刑人改過自新，地動過後大地回春，族群間從衝突變友好，童年回憶越久越甘甜，故所，這本書个書名就安到「回甘」。

來到這位，堵著當多講福佬話个客家人，客家人毋曉講客話，正經當打爽，感謝南投縣政府用心推展，人講：「有心毋驚路頭遠。」復振客語既經行在路項，大家共下打拼，希望俚靚靚个客家語言摎文化做得代代傳承下去。